سید کی لوح تربت (کلام اقبال)

سید کی لوح تربت

اے کہ تیرا مرغ جاں تار نفس میں ہے اسیر

اے کہ تیری روح کا طائر قفس میں ہے اسیر

 

اس چمن کے نغمہ پیراؤں کی آزادی تو دیکھ

شہر جو اجڑا ہو ا تھا اس کی آبادی تو دیکھ

 

فکر رہتی تھی مجھے جس کی وہ محفل ہے یہی

صبر و استقلال کی کھیتی  کا حاصل ہے یہی

 

سنگ تربت ہے مرا گرویدہ  تقریر دیکھ

چشم باطن سے ذرا اس لوح کی تحریر دیکھ

 

مدعا تیرا اگر دنیا  میں ہے  تعلیم دیں

ترک دنیا قوم کو اپنی نہ سکھلانا کہیں

 

وا نہ کرنا فرقہ بندی کے لیے اپنی زباں

چھپ کے ہے بیٹھا ہواہنگامہ محشر  یہاں

وصل کے اسباب پیدا ہوں تری تحریر سے

دیکھ کوئی دل نہ دکھ جائے تری تقریر سے

 

محفل نو میں پرانی داستانوں کو نہ چھیڑ

رنگ پر اب جو نہ آئیں ان افسانوں کو نہ چھیڑ

 

تو اگر مدبر ہے تو سن میری صدا

ہے دلیری دست ارباب سیاست کا عصا

 

عرض مطلب سے جھجک جانا نہیں زیبا تجھے

نیک ہے نیت اگر تیری تو کیا پروا تجھے

 

بندہ مومن کا دل بیم و ریا سے پاک ہے

قوت فرماں روا کے سامنے بےباک ہے

 

ہو اگر ہاتھوں میں تیرے خامہء معجز رقم

شیشہ دل ہو اگر تیرامثال جام جم

 

پاک رکھ اپنی زباں، تلمیذ رحمانی ہے تو

ہو نہ جائے دیکھنا تیری صدا بے آبرو

 

سونے والوں کو جگا دے شعر کے اعجاز سے

خرمن باطل جلا دے شعلہ آواز سے

مکمل تحریر >>>

آفتاب صبح

آفتاب صبح

 

شورش میخانہ انساں سے بالاتر ہے تو

زینت بزم فلک ہو جس سے وہ ساغر ہے تو

 

ہو در گوش عروس صبح وہ گوہر ہے تو

جس پہ سیمائے افق نازاں ہووہ زیور ہے تو

 

صفحہ ایام سے داغ مداددشب مٹا

آسماں سے نقش باطل کی طرح کوکب مٹا

 

حسن تیرا جب ہوا بام فلک سے جلوہ گر

آنکھ سے اڑتا ہے یک دم خواب کی مے کا اثر

 

نور سے معمور ہوجاتا ہے دامان نظر

کھولتی ہے چشم ظاہر کو ضیاء تیر ی مگر

 

ڈھونڈتی ہیں جس کو آنکھیں وہ تماشا چاہیے

چشم باطن جس سے کھل جائے وہ جلوا چاہیئے

شوق آزادی کے دنیا میں نہ نکلے حوصلے

زندگی بھر قید زنجیر تعلق میں رہے

 

زیرو بالا ایک ہیں تیری نگاہوں کے لیے

آرزو ہے کچھااسی چشم تماشا کی مجھے

 

آنکھ میری اور کے غم میں سرشک آباد ہو

امتیاز ملت و آئیں سےدل آزاد ہو

 

بستہ رنگ خصوصیت نہ ہو میری زباں

نوع انساں قوم ہومیری،وطن میرا جہاں

 

دیدہ باطن پہ رازنظم قدرت ہو عیاں

ہو شناسائے فلک شمع تخیل کا دھواں

 

عقدہ اضداد کی کاوش نہ تڑپائے مجھے

حسن عشق انگیزہر شے میں نظر آئے مجھے

 

صدمہ آجائے ہوا سےگل کی پتی کو اگر

اشک بن کر میری آنکھوں سے ٹپک جائے اثر

 

دل میں ہو سوز محبت کا وہ چھوٹا سا شرر

نور سے جس کے ملے راز حقیقت کی خبر

 

شاہد قدرت کا آئینہ ہو ، دل میرا نہ ہو

سر میں جز ہمدردی انساں کوئی سودا نہ ہو

 

تو اگر زحمت کش ہنگامہ عالم نہیں

یہ فضیلت نشاں اے نیر اعظم نہیں

 

اپنے حسن عالم آرا سے جو تو محرم نہیں

ہمسر یک ذرہ خاک در آدم نہیں

 

نور مسجود ملک گرم تماشا ہی رہا

اور تو منت پذیر صبح فردا ہی رہا

 

آرزو نور حقیقت کی ہمارے دل میں ہے

لیلی ذوق طلب کا گھر اسی  محمل میں ہے

 

کس قدر لذت کشود عقدہ مشکل میں ہے

لطف صد حاصل ہماری سعی بے حاصل میں ہے

 

درد استفہام سے واقف ترا پہلو نہیں

جستجو ئے راز قدرت کا شناسا تو نہیں

 

مکمل تحریر >>>

عقل و دل (کلام اقبال)

عقل و دل

عقل و دل

عقل نے ایک دن  یہ دل سے کہا
بھولے بھٹکے کی رہنما ہوں میں

 

ہوں زمیں پر، گزر فلک پہ مرا
دیکھ تو کس قدر رسا ہوں میں

 

کام دینا میں رہبری ہے مرا
مثل خضر  خجستہ  پا  ہوں میں

 
ہوں مفسر  کتاب ہستی کی
مظہر شان کبریا ہوں میں

 
بوند اک خون کی ہے تو لیکن
غیرت لعل بے بہا ہوں میں

 
دل نے سن کر کہا یہ سب سچ ہے
پر مجھے بھی تو دیکھ، کیا ہوں میں

راز ہستی کو تو سمجھتی ہے
اور آنکھوں سے دیکھتا ہوں میں

 
ہےتجھے واسطہ مظاہر سے
اور بان سے آشنا ہوں میں

 
علم تجھ سے تو معرفت مجھ سے
تو خدا جو،  خدا نما ہوں میں
 
علم کی انتہا ہے بے تابی
اس مرض کی مگر دوا ہوں میں

 
شمع تو محفل صداقت کی
حسن کی بزم کا دیا ہوں میں

 
تو زمان ومکاں سے رشتہ بپا
طائر سدرہ آشنا ہوں میں

 
کس بلندی پہ ہے مقام مرا
عرش رب جلیل کا ہوں میں

مکمل تحریر >>>

ہمدردی (کلام اقبال) - آپ کی اردو

ہمدردی

بلبل تھا کوئی اداس بیٹھا

کہتا تھا کہ رات سر پہ آئی

اُڑنے چگنے میں دن گزارا 

پہنچوں کس طرح آشیاں تک

ہر چیز پہ چھا گیا اندھیرا

 

سن کر بلبل کی آہ و زاری

جگنو کوئی پاس ہی سے بولا

 

حاضر ہو ں مدد کو جا ن و دل سے

کیڑا ہوں اگرچہ میں ذرا سا

 

کیا غم ہے جو رات ہے اندھیری

میں راہ میں روشنی کر وں گا

اللہ نے دی ہے مجھ کو مشعل

چمکا کے مجھے دیا بنایا

 

ہیں وہ لوگ وہی جہاں میں اچھے

آتے ہیں جو کام دوسروں کے

 

 

 

 

مکمل تحریر >>>

ماں کا خواب - کلام ِ اقبال

 

 ماں کا خواب

میں  سوئی   جو   اِک  شب   تو   دیکھا   یہ   خواب
بڑھا   اور   جس   سے    مِر ا   اضطراب
 
یہ   دیکھا   کہ   میں   جا   رہی   ہوں   کہیں
اندھیرا    ہے    اور   راہ    ملتی    نہیں
لرزتا   تھا   ڈر   سے   مرا   بال   بال
قدم   کا   تھا   دہشت   سے   اٹھنا   محال
 
جو   کچھ   حوصلہ   پا   کے   آگے   بڑھی
تو   دیکھا   قطار   ایک   لڑکوں   کی   تھی
 
زمرد   سی   پوشاک   پہنے  ہوئے
دیئے   سب   کے   ہاتھوں   میں   جلتے   ہوئے
 
وہ   چپ   چاپ   تھے   آگے   پیچھے   رواں
خدا   جانے   جانا   تھا   ان   کو   کہاں
 
اسی   سوچ   میں   تھی    کہ   مرا   پسر
مجھے   اس   جماعت   میں   آیا   نظر
 
وہ   پیچھے   تھا   اور  تیز   چلتا   نہ   تھا
دیا   اس   کے   ہاتھوں   میں   جلتا   نہ   تھا
 
کہا   میں   نے    پہچان   کر  ،   میری   جاں!
مجھے   چھوڑ   کر  آ  گئے   کہاں!
 
جدائی   میں   رہتی   ہوں   میں   بے  قرار
پروتی   ہوں   ہر  روز   اشکوں   کے   بار
 
نہ   پروا   ہماری   ذرا   تم   نے   کی
گئے   چھوڑ،   اچھی   وفا   تم   نے    کی
 
جو   بچے   نے   دیکھا   مرا   پیچ   و   تاب
دیا   منہ   پھیر   کر   اس   نے   یوں   جواب
 
رلاتی   ہے   تجھ   کو   جدائی   مری
نہیں   اس   میں   کچھ   بھی   بھلائی   مری
 
یہ   کہہ   کر   وہ   کچھ   دیر   تک   چپ   رہا
دیا   پھر   دکھا   کر   یہ   کہنے   لگا
 
سمجھتی   ہے   تو  ہو   گیا   کیا   اسے؟
ترے   آنسووں   نے   بجھایا   اسے

(کلامِ اقبال)

 

 

مکمل تحریر >>>

اقبالیات - بانگِ درا (حصہ اول)

کلام  اقبال	January 1 2022
اس کتاب میں علامہ اقبال کی مختلف شاعری کے مجموعوں سے مختلف عنوانات کے تحت  اقبال کا کلام ناظرین کے لیے پیش خدمت ہے تا کہ ہماری نوجوان نسل جو اقبال کے کلام سے ناواقف ہو کر معاشرے میں اپنے کردار سے ناواقف ہے وہ شعوروآگہی حاصل کرکے اپنی ذمہ داریوں سے کماحقہ واقفیت حاصل کر لے۔		اقبال کی انقلابی شاعری

 

 بانگ ِ درا  (حصہ اول)

معزز قارئینِ کرام!  انتظار کے لیے معذرت خواہ ہوں_ گوناگوں مصروفیات اس سلسلے میں تاخیر کا سبب بنیں۔کلام ِ اقبال  کے  کے سلسلے میں  بانگِ درا سے آغاز کیا جا رہا ہے۔ تو بانگِ درا کا حصہ اول  آپ کی خدمت میں پیش ہے۔جو مختلف  مختصر عنوانات کے تحت چھوٹی چھوٹی پوسٹوں کی صورت میں وقتاََ فوقتاً پیش کیا جائے گا۔

امید ہے کہ دوست احباب بھرپور محبت اور توجہ سے نوازیں گے ۔

 

 

 

آپ کی دعاؤں کا طالب

ابوجمیل

مکمل تحریر >>>