Traffic Laws - Traffic Laws in Pakistan پاکستان میں ٹریفک کے قوانین

                                   

     

مکمل تحریر >>>

کلی| جب دکھاتی ہے سحر عارض رنگیں اپنا

کلی

 

جب دکھاتی ہے سحر عارض رنگیں اپنا

کھول دیتی ہے کلی سینہء زریں اپنا

 

جلوہ آشام ہے صبح کے مے خانے میں

زندگی اس کی ہے خورشید کے پیمانے میں

 

سامنے مہر کے دل چیر کے رکھ دیتی ہے

کس قدر سینہ شگافی کے مزے لیتی ہے

 

مرے خورشید! کبھی تو بھی اٹھا اپنی نقاب

بہر نظارہ تڑپتی ہے نگاہ بے تاب

 

تیرے جلوے کا نشیمن ہو مرے سینے میں

عکس آباد ہو تیرا مرے آئینے میں

  

زندگی ہو ترا نظارہ مرے دل کے لیے

روشنی ہو تری گہوارہ مرے دل کے لیے

 

ذرہ ذرہ ہو مرا پھر طرب اندوز حیات

ہو عیاں جوہر اندیشہ میں پھر سوز حیات

 

اپنے خورشید کا نظارہ کروں دور سے میں

صفت غنچہ ہم آغوش رہوں نور سے میں

 

جان مضطر کی حقیقت کو نمایاں کر دوں

دل کے پوشیدہ خیالوں کو بھی عریاں کر دوں

مکمل تحریر >>>

فراق |تلاش گوشہء عزلت میں پھر رہا ہوں میں

فراق

 

تلاش گوشہء عزلت میں پھر رہا ہوں میں

یہاں پہاڑ کے دامن میں آ چھپا ہوں میں

 

شکستہ گیت میں چشموں کے دلبری ہے کمال

دعائے طفلک گفتار آزما کی مثال

 

ہے تخت لعل شفق پر جلوس اختر شام

بہشت دیدہء بینا ہے حسن منظر شام

 

سکوت شام جدائی ہوا بہانہ مجھے

کسی کی یاد نے سکھلا دیا ترانہ مجھے

 

یہ کیفیت ہے مری جان ناشکیبا کی

مری مثال ہے طفل صغیر تنہا کی

 

اندھیری رات میں کرتا ہے وہ سرود آغاز

صدا کو اپنی سمجھتا ہے غیر کی آواز

 

یونہی میں دل کو پیام شکیب دیتا ہوں

شب فراق کو گویا فریب دیتا ہوں

مکمل تحریر >>>

عشرت امروز|نہ مجھ سے کہہ کہ اجل ہے پیام عیش و سرور

عشرت امروز

 

نہ مجھ سے کہہ کہ اجل ہے پیام عیش و سرور

نہ کھینچ نقشہ کیفیت شراب طہور

 

فراق حور میں ہو غم سے ہمکنار نہ تو

پری کو شیشہ الفاظ میں اتار نہ تو

 

مجھے فریفتہ ساقی جمیل نہ کر

بیان حور نہ کر، ذکر سلسبیل نہ کر

 

مقام امن ہے جنت، مجھے کلام نہیں

شباب کے لیے موزوں ترا پیام نہیں

 

شباب، آہ! کہاں تک امیدوار رہے

وہ عیش، عیش نہیں، جس کا انتظار رہے

 

 

وہ حسن کیا جو محتاج چشم بینا ہو

نمود کے لیے منت پذیر فردا ہو

 

عجیب چیز ہے احساس زندگانی کا

عقیدہ 'عشرت امروز' ہے جوانی کا

 

مکمل تحریر >>>